O santuario das Ermidas corre risco de se derrubar

Un informe encarregado pola Fundación Nuestra Señora de As Ermidas apunta o risco de que este santuario, un dos máis populares de Galicia, se derrube. Segundo explica Luís Maroto, vicepresidente da entidade e enxeñeiro, nos últimos anos as filtracións de auga están a provocar unha inclinación crecente nun dos muros exteriores do templo, o que pode provocar o derrubamento da bóveda de non se corrixir. Desde a fundación apuntan que hai 14 meses que se lle remitiu a Patrimonio un proxecto para eliminar as filtracións, sen que polo de agora se obtivese resposta sobre a cuestión.