O Pazo da Cultura de Narón acolle entre o 1 e o 24 de marzo as doce actuacións que fan parte do programa do IX Singular, Festival Internacional do Monólogo Teatral. Lolita Flores é a encargada de abrir a edición con Poncia, unha adaptación de A Casa de Bernarda Alba, de Federico García Lorca. Para o día 2 será a quenda de Ibuprofeno Teatro, que leva a escena Deadpan Karaoke, a súa última produción, protagonizada por Marián Bañobre, mentres o 3 A Cova das Letras presenta a súa Frida.
As actuacións continuarán ao longo das fins de semana do mes, coa narración oral de Bea Campos e Marcho, que teño que marchar, Lunátika de La MedinaEs Company e mais O Arquivo do Chibo de Pablíssimo os días 8, 9 e 10.
Para o día 15 a Compañía Eléctrica levará a escena a historia da "Miss España galeguista" en Miss Docet da man de Iria Pinheiro. O 16 é a quenda da compañía uruguaia Teatro La Morena e a súa Yo soy Fedra. Fecha a fin de semana Aurora Artes Escénicas coa obra familiar Maruxiña.
As últimas sesións, dos días 22 a 24, compoñen o programa Butacazero, con Esther F. Carrodeguas a levar a escena O único que verdadeiramente quixen toda a vida é ser delgada, o D. Ramón María del Valle Inclán de Bravo Teatro e mais a Historia dunha nena namorada do mar con que O Sol de Outono fecha esta xeira do festival. As entradas para todas as funcións están á venda no web do Padroado de Cultura de Narón.
