Un total de doce espectáculos e oito actividades paralelas compoñen o programa do XI Festival Singular. O encontro dedicado ao monólogo teatral desenvólvese en Narón entre os días 6 e 29 de marzo a achegar dúas estreas galegas e dúas estatais e coa participación de sete compañías do país e dúas internacionais.
El hijo de la cómica, da compañía Pentación e con José Sacristán, é unha das estreas a nivel galego canda a Sahara, la barca del desierto, da compañía canaria Unahoramenos. Ser humana, da actriz e dramaturga uruguaia Angie Oña; e mais a montaxe Girasoles para María, da compañía da creadora cubana Gretel Cazón conforman as estreas estatais desta xeira.
A estas súmanse as montaxes Bailar agora, de Marta Alonso Tejada, Esperta o rinoceronte de Nao Caracola, e As aventuras de Mariña da man de Alba Bermúdez. Anabel Alonso protagonizará La mujer rota de LaZona Teatro, Estrafalaria, con Atenea García, Chegar e encher, da man de Bea Campos, Costa da Morte, cartografía dun naufraxio, con Mariña Lestón e Canta, buguina, canta de Marta Ortiz completan as propostas escénicas do festival.
A estas súmanse tres accións formativas da man de Noemí Rodríguez, Esther Carrodeguas e Angie Oña, un encontro arredor dos festivais internacionais de artes escénicas e unha rolda contactos entre axentes de xestión cultural e compañías galegas. De xeito paralelo, o evento acollerá unha asemblea da Rede Eurolatinoamericana de Artes Escénicas, REDELAE.
