A Xunta financiará e organizará o novo museo diocesano de Ourense

O pasado venres o conselleiro de Cultura en funcións, Román Rodríguez, asinou un protocolo de colaboración co bispado de Ourense para a "rehabilitación arquitectónica da capela do Pazo Episcopal de Ourense e dos seus espazos inmediatos e, así, convertelo na sede do Museo Diocesano". Segundo o acordo, a Xunta comprométese a "seleccionar o equipo de arquitectura e museografía, a través de concurso público, a redactar a documentación técnica pertinente e a dotación do equipamento funcional, expositivo e museográfico". A Xunta comprométese a financiar o proxecto e asesorar e facilitar a xestión para garantir a conservación do patrimonio cultural do museo.