A Xunta adquiriu seis novas propiedades no exterior da croa do castro de Viladonga que permitirán "ampliar usos sociais e culturais deste espazo e os traballos de escavación e investigación". Os terreos adquiridos incorporarán 20.000 metros cadrados á superficie do recinto arqueolóxico musealizado e posibilitará avanzar "nos estudos do sistema defensivo do castro, así como no de outras zonas de intensa ocupación e utilización". As adquisicións prodúcense despois das investigacións que en 2023 desvelaron a existencia de zonas de ocupación no exterior da croa do castro, na área occidental, detectadas a partir da investigación con xeorradares e gradiómetros, mentres que na área oriental (a zona na que se atopa o museo) aparecen restos defensivos.
