Pontevedra acolle as XII Xornadas sobre o Entroido de Galiza

O Teatro Principal de Pontevedra será o escenario, os vindeiros 16 e 17 de febreiro, da duodécima edición das Xornadas sobre o Entroido de Galiza. Esta iniciativa, que cada ano aborda as tradicións propias destas festas, conta nesta ocasión cun relatorio específico sobre a celebración en Salceda de Caselas, a cargo de Manuel Cabaleiro e Abel Pérez.

Canda a eles, Cristina Fernández falará na xornada inaugural do Entroido do Bolo, mentres o día 17 haberá un relatorio sobre Os Galos da Mezquita a cargo da asociación que mantén esta tradición.

O programa complétase con presentacións das últimas publicacións sobre o Entroido tradicional. Deste xeito, o antropólogo Xerardo Quintía intervirá arredor do seu Descifrando o Entroido o 16, e o 17 Carlos X. Ares dará a coñecer o seu Animalario do Entroido Galego e Adriana del Río e Hadrián Román presentarán O merdeiro. Personaxe da Ribeira.

Todas as persoas participantes no programa farán parte tamén dunha mesa redonda no final de cada unha das xornadas. A Sociedade Antropolóxica Galega organiza esta iniciativa co apoio do Concello de Pontevedra.