O Teatro Principal de Pontevedra acolle estes días 20 e 21 de febreiro as XIV Xornadas sobre o Entroido de Galiza que organiza a Sociedade Antropolóxica Galega. A iniciativa inclúe no programa da súa primeira sesión a presentación do traballo fotográfico Microcosmos de Roberto de la Torre e mais do documental O regreso da Momada. O proceso de recuperación desta festividade de Aguasantas, en Cerdedo-Cotobade contará ademais cunha presentación a cargo do antropólogo Rafa Quintía e mais de Manuel Suárez, un dos artífices do seu renacemento.
As propostas do día 20 complétanse cun relatorio de Roberto Álvarez encol do Entroido de Mugares, en Toén, e cunha mesa redonda entre as persoas participantes. Para o día 21 o programa conta tamén coa presentación de Anxo Rosales "Pastores de seres indómitos". Bruno Villamor abordará o Entroido na Ulloa a falar do caso de Santo Xusto, mentres María Xesús Blanco Sobrino tratará o de Laza. As xornadas finalizarán con outra mesa redonda a reunir todos os relatorios.
Programa completo das XIV Xornadas do Entroido de Galiza
