Nas propostas para este ano destaca a exposición Xesús Chichi Campos: o humor de trazo elegante que se poderá ver entre o 30 de xaneiro e o 12 de maio na Biblioteca de Galicia, na Cidade da Cultura. A proposta recolle pezas de nomes actuais do humor gráfico e a BD galega como Leandro Barea, Iván Mourente ou Idoia de Luxán. Ademais, o centro da Cidade da Cultura celebrará o obradoiro Retrato creativo de Chichi Campos este 27 de xaneiro.
Canda a isto, poderá verse o documental Chichi e mais eu, realizado polo fillo do homenaxeado, Nico Campos, nas bibliotecas da Coruña (día 29), Pontevedra (30), Vigo (29 e 30), na Biblioteca de Galicia (2 de febreiro) e na Ánxel Casal (14 de febreiro).
Unha mostra bibliográfica na biblioteca da Coruña (do 31 de xaneiro ao 13 de febreiro), un punto de información sobre o autor en Ourense e as exposicións Chichi Campos: elegante can sen dono e Novas ilustradoras galegas na biblioteca Juan Compañel de Vigo son tamén parte das homenaxes, que se completan con diferentes obradoiros de ilustración, como Ilustrar sen dono, no que se repasa a biografía do autor, canda a outros dedicados á caligrafía ou propostas de contacontos en espazos bibliotecarios do país.
Tamén as escolas de Arte súmanse a efeméride a acoller obradoiros sobre libro obxecto na da Coruña, autoedición na de Lugo e a conferencia Chichi campos e a importancia da autoedición durante o franquismo da man de Nico Campos o 30 de xaneiro. Rebeca Varela correu co cartel que celebra esta edición do Día da Ilustración.