Recreación do futuro paseo dirante das carpintarías de ribeira de Moaña. Fonte: MITECO
As carpintarías de ribeira de Casqueiro, que ardera en 2017, e mais de Carlagho, no Concello de Moaña, serán obxecto dunha rehabilitación integral. A Deputación de Pontevedra e o Concello asinaban este martes 19 de decembro o acordo polo que investirán 919.000 euros para recuperar estes bens catalogados e que fan parte do Ben de Interese Cultural do Patrimonio Inmaterial da carpintaría de ribeira.
O proxecto inclúe recuar as fachadas destas instalacións, que ata o momento interferían co trazado do paseo marítimo existente na zona da praia da Xunqueira, co obxectivo de facilitar o tránsito. Canda a isto abordarase "a posta en valor das ramplas-varadoiro, a reconstrución da carpintería de ribeira de Casqueiro, volvendo recuperar a súa estrutura de madeira; e a conservación e mellora da fachada e estrutura da carpintería de ribeira de Carlagho", segundo explica a Deputación. As obras prevén un futuro uso cultural e museístico dos antigos estaleiros.
O acordo que se asinou este martes 19 de decembro prevé que a institución provincial achegue 690.000 euros a este proxecto, mentres o concello correrá cos 230.000 restantes.
