As carpintarías de ribeira de Moaña entran no Catálogo do Patrimonio Cultural

O Diario Oficial de Galicia recolle hoxe a resolución que inscribe no catálogo do patrimonio cultural, como como lugar de valor etnolóxico, das carpintarías de ribeira de Carlagho e Casqueiro, en Moaña. As instalacións, que comezaron a súa actividade en 1942, supoñen dous dos escasos exemplos deste tipo de obradoiros que se conservan no noso país, e a súa protección está a ser reivindicada desde hai anos desde diversos colectivos como a Federación Galega pola Cultura Marítima e Fluvial.

O expediente recolle a "total destrución" que sufriu o estaleiro do Casqueiro en xuño de 2017, "quedando soamente partes dos muros perimetrais nun precario equilibrio e desaparecendo todo o material e instalacións que acubillaba no seu interior". No entanto apunta que "os informes técnicos realizados xustifican a protección das estruturas como lugar en que se realizara a actividade da carpintaría de ribeira", aínda que "cun nivel de protección de carácter ambiental que permitise, no contexto dunha rehabilitación, a recuperación das actividades, ou doutras de carácter cultural".

No entanto, a declaración non afecta "ás ferramentas e maquinaria interior" xa que as protexer "poderían supoñer outorgarlle unha valoración material prexudicial en relación co seu necesario uso e desgaste para a realización das actividades propias da construción tradicional das embarcacións, que é o principal valor que nelas se protexe". A declaración a posibilidade de que se poida continuar o paseo marítimo, unha cuestión que motivou un intenso enfrontamento entre veciños e colectivos partidarios desta infraestrutura e aqueles que defendían a permanencia das carpintarías. No entanto, a orde establece que o mesmo deberá continuar "pola fronte marítima, compatibilizándoa co nivel das edificacións que se deben manter e garantindo as solucións compatibles coa saída e contacto co mar".