O Salón de Actos do Ministerio de Industria, en Madrid, acollía na mañá deste 15 de decembro o acto de entrega dos Premios Nacionais de Artesanía 2023. A edición conseguiu unha presenza galega inédita destes galardóns, con representación do noso país en tres das cinco categorías convocadas.
De xeito máis concreto, o cesteiro Álvaro M. Leiro, de Pazos de Borbén, foi recoñecido co Premio Nacional de Artesanía. Ao tempo, o obradoiro de tecido Inés Rir&Co, de Allariz, obtivo o galardón na categoría de Produto. Pola súa banda, a cesteira Julia de la Cal, do obradoiro La Parabólica, quedou como finalista no Premio Emprendemento.
A estes recoñecementos súmase o que obtivo a Fundación Pública Artesanía de Galicia, que conseguiu o premio na categoría Promociona para Entidades Públicas polo encontro Corazón da Artesanía, que se celebra en Agolada.
Coa victoria de Leiro, que se suma ao Obradoiro de Gaitas Seivane e a Elena Ferro, hai xa tres profesionais da artesanía galega que se fan con este Premio Nacional.
