Premios de Artesanía para Noroeste Obradoiro, Madriguera Workshop e Julio Lado

Nunha cerimonia celebrada na Cidade da Cultura a Fundación Centro Galego da Artesanía e do deseño entregou onte os seus tres premios convocados este ano. Os premios Artesanía de Galicia 2016 recaen, na categoría Premio Traxectoria, no ourive compostelán Julio Lado; no obradoiro ferrolán de cerámica Madriguera Workshop, que recibiu o premio de formación Bolsa Eloy Gesto; e en Noroeste Obradoiro, de Santiago e especializado en xoiaría, na categoría Premio Artesanía de Galicia, na que resultou segundo finalista o ceramista coruñés Víctor Ares e terceira finalista a artesá do vidro con obradoiro en Teo, Rosa Méndez. O conselleiro de Economía, Emprego e Industria, Francisco Conde, presidiu a entrega destes galardóns cos que se contribúe á posta en valor do sector, potenciando a creatividade e impulsando a remuda xeracional.

Segundo Conde, hoxe a artesanía “emprega a máis de 5.000 persoas en Galicia, logra captar novos emprendedores e supón unha importante vía de dinamización económica e turística, especialmente nas zonas rurais”. A categoría Premio Artesanía de Galicia, que ten por obxectivo recoñecer a obra que mellor representa á artesanía competitiva e que conxuga os valores tradicionais do sector coas novas tendencias, está dotada con 6.000 euros, recaeu en Noroeste Obradoiro, de Santiago de Compostela e especializado en xoiaría, que presentou a peza con lema Voluta Volutidae. O Premio Traxectoria, co que se fai un recoñecemento honorífico ao conxunto da traxectoria dun artesán, no que se valora tanto a calidade da súa obra como o seu compromiso coa divulgación e transmisión do oficio e dos valores positivos da artesanía, recaeu no prateiro e ourive Julio Lado (Santiago, 1937), a proposta da Asociación Galega de Artesáns. O Premio Bolsa Eloy Gesto, dotado con 3.000 euros para investir en formación, ten a finalidade de potenciar a remuda xeracional na artesanía, o acceso de novos talentos ao sector e a súa profesionalización. Nesta edición recae en Madriguera Workshop, un obradoiro creativo inscrito no Rexistro Xeral de Artesanía de Galicia no ano 2015 que se dedica ao deseño e á elaboración artesanal de pezas de autor. Especializado na cerámica, conta cunha serie de coleccións propias, de produtos funcionais e de cotío. Asemade, colabora ofrecendo solucións de deseño de produto en proxectos por encargo. O equipo está formado por Luis Llamas e Lydia de la Piñera, ambos con formación en artes aplicadas.