Esquema da nova museografía da área de Numismática do Museo Provincial de Lugo. Fonte: Deputación de Lugo
O Museo Provincial de Lugo dispón dunha das coleccións numismáticas máis importantes de Galicia e recentemente medrou coa adquisición a un coleccionista particular dun exemplar singular da moeda da caetra, a emblemática acuñación do exército romano producida durante a conquista do noroeste peninsular e que foi declarada BIC en 2022. Co obxectivo de "enxalzar o sestercio da caetra" a Deputación vai renovar a sección de numismática e medallística do museo nun entorno museográfico "dinámico, didáctico e contextualizador". A nova museografía destacará as moedas con "imaxes e elementos gráficos que incidan na relevancia das moedas desde o punto de vista histórico", incrementando a superficie expositiva, a iluminación e pantallas para proxectar imaxes en 3D das moedas. Os traballos iniciaranse a principios de ano.
