O ciclo Galicia é Cine leva cinco producións galegas ao exterior

O Centro Cultural España de Río Gallegos acolle este 12 de outubro a proxección do filme Cuñados. A actividade abre o novo programa Galicia é Cine, que desenvolve a Secretaría Xeral da Emigración, en colaboración coa Fundación Araguaney, que pretende achegar o cine galego de maior éxito aos centros galegos do mundo.

Canda ao de Río Gallegos, o Centro de Cultura España de Córdoba, o de Centro Galego de Londres e a Hermandad Gallega de Venezuela, en Caracas, participan desta primeira xeira do programa. En cada un destes espazos poderán verse, ademais de Cuñados, as producións Matria, O que arde, A Esmorga, e Ons.

O presidente da Fundación Araguaney-Ponte de Culturas, Ghaleb Jaber Martínez e mais o secretario xeral da Emigración, Antonio Rodríguez Miranda, presentaban a iniciativa este dez de outubro. Rodríguez apuntaba nese acto que "con este novo programa queremos non só difundir o noso cine entre os galegos do exterior, senón tamén amosar a tradición e a vangarda do mesmo, un cine que destaca pola súa fotografía na que se amosa o noso gran valor paisaxístico tanto rural coma urbano, como polos valores culturais e etnográficos que amosa".