A MIT de Ribadavia acolle a presentación dun proxecto documental sobre a memoria do teatro galego

O teatro galego foi unha importante parte da acción cultural antifranquista e da recuperación da cultura galega nos inicios da democracia e da autonomía. Pero aínda se carecía dun relato amplo audiovisual que recollera a palabra de algúns dos protagonistas que, desde os anos 60, participaron na renovación e modernización das artes dramáticas de Galicia. Mañá, venres 21 de xullo, e o sábado 22 ás 19 horas, o Consello da Cultura Galega presentará no Museo Etnolóxico de Ribadavia e no marco da Mostra Internacional de Teatro as súas iniciativas para recoller a memoria deste tempo e dos seus participantes. O proxecto "A memoria do teatro galego na Transición", contará na súa primeira fase con dous documentais, "O teatro independente (1965-1978)" e "A profesionalización. A Mostra de Teatro Abrente de Ribadavia (1973-1980)". Os espectadores poderán ver un avance dos documentais, dirixidos por Tito Asorey. O día seguinte, sábado, o Museo Etnolóxico tamén acollerá un debate sobre o "Cincuenta aniversario da Mostra de Teatro Abrente e a súa importancia no nacemento do sistema teatral galego", que contará coa participación de varios dos membros do colectivo das artes escénicas que participaron neses primeiros momentos da Mostra de Teatro.