Foz abre, este 26 de xullo, a segunda edición de Abanea. O Festival de Danza e Movemento celebra desta volta a súa actividade en Outes, Gondomar e Allariz ademais de na vila da Mariña, cun programa que se desenvolve ata o vindeiro día 30. En total serán quince funcións de dez espectáculos as que farán parte desta iniciativa que organiza ISMO Cultura co apoio da Xunta de Galicia.
A programación distribuída desta xeira achegará o espectáculo A raíz de de Daniel Rodríguez, Vestirme de ti de Nuria Sotelo e Clara Ferrão, Human 21 da catalá Sandra Maciá, The Sad-Mad Method, da tamén catalá Clara Sisteré e Minguantes da compañía galega Entremáns, Proserpina da madrileña La mínima.
A estes títulos súmase Me fui con tu nombre de No Man's Land Cie e Samsara de Chey Jurado e Javito Mario desde Estremadura. O colectivo La Incendaria, con membros de Galicia, Madrid e Euskadi estrearán en Allariz a versión non convencional de Sun Dogs o día 30, mentres desde Euskadi Ertza levará a escena Otempodiz na mesma localidade.
Ademais de actuacións, o programa levará ás localidades participantes o obradoiro Discoteca de señoras, destinado a "todas aquelas persoas adultas que teñan ganas de bailar e de festexar o día" mediante diferentes dinámicas de danza, un de danza en familia e unha pista de baile aberta a todas as persoas asistentes ao final de cada xornada.
