A danza contemporánea espállase por Galicia co Festival Abanea

O Festival Abanea celebrará entre o 17 e o 21 de xullo a súa terceira edición cun programa de danza e artes do movemento que distribuirá 16 funcións de 10 compañías entre os concellos de Foz, Outes, Allariz e, engadíndose este ano, Ames e Marín, o que amplía o evento á provincia de Pontevedra. ISMO Cultura, colectivo organizador do encontro, espallará así a actividade do certame ás catro provincias e farao coa colaboración das localidades participantes e a través dun convenio asinado coa Consellería de Cultura, Lingua e Xuventude. Abanea 2024 desenvolverase cun programa que se espalla por espazos diversos e singulares, levando pezas de non máis de 20 minutos de duración, de base contemporánea, que dialogan con outros estilos como as danzas urbanas ou o ballet clásico, con temáticas que xiran arredor dos soños, da dureza ou fraxilidade dos corpos, da identidade, do trauma ou do amor, creadas, producidas e interpretadas por profesionais de Galicia, México, Portugal, Madrid, Cataluña, Andalucía e Euskadi. Abanea dirixe nesta terceira edición un especial interese na creación de novos públicos e no fomento do afecto da sociedade cara á danza. Ademais dos obradoiros que se repiten en todas as localidades, baixo a dirección de Carlota Mosquera, ponse en marcha Canle Abanea como ferramenta de interacción, dinamización e documentación do festival para conectar o público presencial e virtual dun xeito diferente e divertido en relación cos contidos do festival.

Foz marcará o inicio desta terceira edición de Abanea o 17 de xullo, coa exhibición na contorna do paseo da Rapadoira das pezas 'Ollos cara adentro', da compañía Ixa (Galicia-Euskadi); 'SunDogs', creada polo colectivo La Incendiaria (Galicia-Euskadi) dentro do apoio bienal do festival da edición de 2022; e Ior, da compañía Marc Fernández (Cataluña). A actividade na vila lucense complétase con dous obradoiros no Centro de Interpretación da Mariña: Danza en familia, dirixido por Alejandra Balboa, e A danza como lugar de recreo, con Yeinner Chicas, que se repetirán en todas as localidades implicadas, ao igual que o colofón da xornada, sempre co obradoiro-espectáculo 'A pista de baile', un convite libre á danza a través do encontro creativo entre a bailarina Marta Alonso Tejada e o DJ Set de Mounqup. O 18 de xullo Abanea trasládase ao Espazo Museístico da Carpintaría da Ribeira de Broña, en Outes, para amosarlle ao público tres espectáculos a cargo de Melania Olcina (Madrid), Premio Nacional de Danza 2023; Paulina Espinosa e Mariana Oliveira (México-Portugal), gañadoras do certame de creación Sólodos en Danza de Costa Ricae a Compañía Ixa. Seguindo na provincia da Coruña, Ames recibirá o festival o venres 19 de xullo no Pazo da Peregrina de Bertamiráns. O sábado 20 a proposta trasládase a Marín, onde a contorna da praia de Portocelo acollerá unha programación de espectáculos. Finalmente, na provincia de Ourense Allariz pecha o percorrido desta terceira edición de Abanea o 21 de xullo coa creación do Colectivo Premohs (Andalucía) que presenta 'En cuclillas' na Praza do Matadoiro, onde tamén poderá verse a peza 'Pensar a contratempo', unha versión diferente de A pista de baile, nesta ocasión coa colaboración de Bigsouth- música e baile swing.

Residencias e encontros profesionais
Dentro das liñas de acción do festival, Abanea xera Rede de A, que tece contextos de encontro, investigación e acompañamento ás artistas seleccionadas ata o momento no apoios por dous anos. Nesta edición o festival facilita dúas residencias artísticas: a que terá lugar en Bugallido, Ames, os días 15 e 16 de xullo, na que participan as catro artistas vinculadas ao apoio bienal, e a de fin de proceso que realizará Suevia Rojo nese mesmo concello entre o 8 e o 18 de xullo.Ademais, durante os días 16, 17 e 18 de xullo terá lugar tamén en Ames un workshop internacional co bailarín Milan Herich (Bruxelas) centrado na técnica flying low; e o día 19 de xullo facilítase un encontro entre profesionais do sector, con diversas actividades no Pazo da Peregrina arredor da xornada de programación que terá lugar ese día.