Membros do SEG no Dólmen de Dombate. 18 de xullo de 1936. Fonte: AC Alexandre Bóveda
Unha fotografía no Dolmen de Dombate tomada o 18 de xullo de 1936 é a derradeira imaxe que existe do Seminario de Estudos Galegos. A Agrupación Cultural Alexandre Bóveda, da Coruña, fixo pública a instantánea nas súas redes sociais este 14 de xuño a coincidir coa conferencia que imparte, ás 19:30 horas na súa sede, Iria-Friné Rivera Vázquez co título
Celebrando o SEG. Emulación, emancipación, redención.
A palestra céntrase na campaña de investigación que o Seminario desenvolveu ao longo do verán de 1936, na liña das que realizaba desde a súa posta en marcha trece anos antes. A imaxe que a Alexandre Bóveda rescatou dun arquivo particular preséntase como a homenaxe que, no marco destas actividades, o SEG rendeu a Eduardo Pondal coa visita ao megálito que o bardo cantou nos seus versos. "Ese foi tamén o derradeiro día no que o SEG viu a luz do día", apunta a Agrupación.
A fotografía, canda a outros contidos sobre a institución, poden atoparse na publicación de Iria-Friné O Seminario de Estudos Galegos, que se distribuirá ás persoas que asistan á conferencia e que está tamén dispoñible para libre descarga no web da A.C. Alexandre Bóveda.
