Os fondos bibliográficos do escritor lugués Arcadio López-Casanova, falecido en 2022, ficarán en custodia da Biblioteca de Galicia. Este espazo situado na Cidade da Cultura, en Compostela, albergará a colección doada por María del Carmen Paramio, viúva do autor, e cifrada en 3.608 volumes, dos que 1.250 son de tema, autoría ou lingua galega. O legado inclúe desde volumes do século XVIII ata manuscritos e mecanoscritos das propias obras do poeta, e quedará a disposición do público logo da súa catalogación.
Canda a este recoñecemento, unha antoloxía do traballo deste autor verá a luz o vindeiro mes de xullo no marco da Festa da Palabra que organiza a Fundación Insua dos Poetas. Tamén a Xunta de Galicia anunciou para 2024 un volume que compilará a produción dispersa do que foi un dos principais renovadores da poesía galega nos anos 70.
