O artigo Réquiem por un sombreiro, publicado no Faro de Vigo valeulle a Mar Mato facerse co Premio Afundación de Xornalismo Fernández del Riego na súa vixésima edición. A redactora recibiu o galardón, dotado con 10.000 euros, este 30 de maio nun acto que se desenvolveu na sede de Afundación en Vigo e no que se seleccionou o seu traballo entre tres finalistas.
Canda a ela, foron seleccionados como finalistas o artigo de Begoña R. Soteliño Gafas de pasta, cores de Warhol... Letras Galegas e o de Manuel Varela Cando atopei a paz nun Dacia, publicados en La Voz de Galicia. A organización do certame apuntou a alta participación desta xeira, que bateu marcas con 32 traballos a concurso.
Víctor F. Freixanes, presidente do xurado destacou tamén a calidade dos traballos presentados "que no caso das tres finalistas foi poñer en palabras as emocións e sentimentos profundos que todos temos. Os vosos traballos son moi intensos e están moi ben escritos e corroboran a idea que comentabamos o ano pasado: as xornalistas literarias engrandecen a nosa literatura".
Canda a el, fixeron parte do comité de selección Fina Casalderrey, María Varela, Gloria Rodríguez López, Xosé Carlos Caneiro e Francisco Castro, premiado na anterior edición.
A coincidir co vinte aniversario deste certame, Afundación publicou un volume que compila todos os traballos que se premiaron na súa traxectoria. No mesmo incluirase, a xeito de separata, o artigo gañador desta xeira.
