A danza contemporánea tomará o castelo de San Antón co Festival Quincegotas

O festival de danza de rúa 'Quincegotas', celebrará a súa sexta edición o vindeiro domingo 4 de xuño na Coruña. O Castelo de San Antón acollerá sete espectáculos de danza contemporánea dirixidos a público amplo. Este ano o evento inclúe no programa tres estreas en Galicia e outra nacional. Todos os espectáculos son de balde e abertos ao público. No cartel inclúese Leira, de Nova Galega de Danza e 'Ollos cara adentro' de iXa, un proxecto cultural codirixido por Xián Martínez e Mariona Jaume, que nesta montaxe indaga no rol de rachar convencións que teñen os soños, facendo que nos cuestionemos os límites entre a lóxica e a razón. Ademais deles por San Antón pasarán tamén as compañías Akira Yoshida, Alvaro Murillo, Cave Canem, Kiko López, Maximiliano Sanford e Yeinner Chicas.

As artes performativas terán tamén un marco de reunión co público en Santiago de Compostela grazas ao Festival Plataforma, que ofrecerá entre o 7 e o 15 de xuño, un amplo abanico propostas multidisciplinares entre as que destacan Olga Mesa, Cristina Balboa, Catarina Silva, Marc Vives, Mery Pais, Hugo Torres, Verónica Ruth Frías, Olga Cameselle e Alfredo Rodríguez, Federico Vladimir e Pablo Lilienfeld. O festival está dirixido por Mónica Maneiro, Iñaki Antelo e David Barro e a inauguración desta cuarta edición, o xoves 8 de xuño, será a cargo Antón Reixa cunha performance en colaboración coa Banda Municipal de Música de Santiago. Organizado pola Cooperativa Performa co apoio do Concello de Santiago, o Festival Plataforma dinamizará as rúas e prazas da cidade, como o Cruceiro de San Pedro, as prazas do Obradoiro e a Quintana e os parques de Bonaval e de Belvís, ademáis dos espazos de Fundación DIDAC, a sede de SGAE Sociedad General de Autores e Editores, a Fundación Eugenio Granell, a sala Riquela ou o CGAC, con performances, música, danza, propostas escénicas, encontros, talleres, conferencias performativas e arte contemporánea. No Parque de Bonaval, Olga Cameselle e Alfredo Rodríguez presentarán 'Cando marche non vou pechala porta', un espectáculo de danza; e na sede de SGAE, a bailarina e coreógrafa Olga Mesa ofrecerá 'Una mesa propia (Danza de manos)', unha performance audiovisual. O festival clausuraráse este ano no CGAC coas actuacións de Marc Vives e Cristina Balboa.