Unha das figuras máis relevantes da arte galega das últimas décadas, o pintor Alberto Datas, protagoniza a nova xornada do ciclo Revisando a nosa arte do Consello da Cultura Galega. A Casa das Campás, en Pontevedra, acolle o 31 de maio este encontro, que abrirá cunha intervención de Manuel Quintana Martelo, presidente da Academia de Belas Artes, e de Paula Cabaleiro, coordinadora da actividade.
Canda a eles, a sesión contará coa mesa redonda "Achegándonos á vida e obra de Alberto Datas, a través de olladas cómplices dende o comisariado, a historia da arte, a crítica e o mercado". A galerista Marisa Marimón, o crítico Alberto Ruiz de Samaniego e Xavier Seoane, que organizou en 2009 a mostra Alberto Datas (1935-2007) na Fundación Luís Seoane intercambiarán as súas visións sobre este creador.
O Consello lembra que Datas "foi un dos máis influentes representantes da plástica galega do último século". Influencias de Bacon, Gorky, Basquiat ou Pollock, "debuxan un artista que deconstruía o que vía ao seu redor para construír a través da expresión máis primixenia". Cun firme compromiso pola independencia creativa e a experimentación, Datas "desenvolveu unha intensa traxectoria, na que destacan as numerosas exposicións que realizou en todo mundo".
