A sala Manuel Moldes da Facultade de Belas Artes da Universidade de Vigo, en Pontevedra, acolle ata o vindeiro 29 de xuño 9 narrativas gráficas e unha animación desesperada. Esta exposición comisariada por Kiko da Silva reivindica o traballo de antigos alumnos deste centro no campo da banda deseñada.
Obras de Brais Rodríguez, Jano, José Domingo, Julia Lago, Martín Romero, Miguel Cuba, Miguel Porto e Miguel Iglesias, así como polo propio comisario compleméntanse cunha mostra do traballo en animación de Alberto Vázquez, que tamén foi estudante nesta facultade.
Segundo destacou Kiko da Silva sobre o proxecto, a mostra achega "unha pequena pincelada" dun panorama de BD no noso país no que conviven "gran cantidade de estéticas e de procesos creativos" e para o que tivo especial importancia a creación da Facultade de Belas Artes en Pontevedra.
A iniciativa coincide co cambio de coordinación deste espazo cultural, que será responsabilidade de Ignacio Pérez-Jofre logo de tres anos en mans de Chelo Matesanz.
