O economista político Manuel Colmeiro, novo Científico galego do ano

O economista e avogado Manuel Colmeiro foi escolido pola Real Academia Galega de Ciencias como Científico galego do ano, a distinción coa que anualmente se recoñece o labor e contribución de científicos do pasado a Galicia e á ciencia. A RAGC afirmou no seu comunicado de prensa que Colmeiro "non só foi un académico sobresaínte, polifacético, fecundo e recoñecido, cunha obra que influenciou a múltiples economistas, xuristas e historiadores. Foi tamén unha forza de cambio económico e social en Galicia e España". Catedrático das universidades de Santiago e de MAdrid, Colmeiro participou en diferentes proxectos reformistas en Galicia na década de 1840, como afrontar a situación da fragmentada estrutura de propiedade do campo galego ou formando parte de comisións vinculadas a estudar a mellora das comunicacións viarias ou a industrialización de Galicia.