Este xoves 13 de abril, ás 19:00 horas, o auditorio da Fundación Luís Seoane da Coruña acolle a estrea de Chichi e mais eu. Este documental sobre a figura de Chichi Campos, dirixido polo seu fillo Nico, aborda un retrato deste polifacético guionista, debuxante e humorista gráfico falecido en 1991.
O acto fai parte das actividades coas que esta entidade reivindica a figura de Campos, e que continúan o vindeiro día 21 coa inauguración de Xesús! 70 anos de Campos, exposición que se poderá ver ata o vindeiro mes de outubro. A primeira retrospectiva que se lle dedica a este creador en trinta anos reúne máis de 200 pezas entre fotografías, obxectos persoais, debuxos, cómics, revistas, libros de artista, deseños, guións e documentación diversa que compoñen un retrato único, "intelixente e irreverente" da Galicia dos anos setenta e oitenta.
Segundo sinala a presentación do proxecto, que tamén comisaría Nico Campos, o homenaxeado "foi testemuño dunha época na que todo semellaba posible e do rápido desengano posterior, uns acontecementos políticos, históricos e sociais que foi plasmando nuns debuxos que deixaban ver a súa enorme cultura, o seu sentido do humor, a súa ironía e unha lucidez que anunciaba con bastante precisión o mundo no que vivimos hoxe".
A exposición complementarase cunha publicación que amosará traballos inéditos do autor, como "guións, debuxos, textos e mesmo un bestiario da política nacional de finais do 80 pertencentes ao Fondo Documental de Chichi Campos".
