Un investimento de 110.000 euros recuperará a Ermida da Lanzada

Os traballos inclúen un estudo arqueolóxico e un levantamento 3D do edificio

Os traballos inclúen un estudo arqueolóxico e un levantamento 3D do edificio
Ermida da Nosa Señora da Lanzada. Fonte: Turismo de Galicia.
A empresa Parteluz Estudio foi seleccionada pola Xunta de Galicia para realizar os traballos de restauración da Ermida da Nosa Señora da Lanzada, en Sanxenxo. Os traballos, que contan cun orzamento de 110.000 euros queren "evitar un posible deterioro irreversible ou a perda de elementos de valor artístico e cultural", segundo explica a Consellería de Cultura.

O proxecto inclúe traballos de limpeza e consolidación na superficie pétrea do templo, eliminando plantas, morteiros deteriorados e cemento, así como restos de sal. Tamén se asentarán as sopenas e a cruz da fachada principal, que na actualidade está torta. O proxecto inclúe ademais "un estudo histórico-arqueolóxico mediante sondaxes arqueolóxicas manuais" e "un levantamento 3D da capela mediante fotogrametría, escalado e xeoreferenciado exterior". O prazo de realización dos traballos é de 5 meses.