Ponte de Pontedeume. Fonte: Turgalicia
O delegado do Goberno en Galicia, José Miñones, presentaba este 22 de marzo en Pontedeume o proxecto de recuperación da ponte que une esta localidade con Cabanas. Datado no século XIX este conxunto segue a ser hoxe unha vía de comunicación fundamental entre as localidades e soporta diariamente 10.000 vehículos, que chegan a ser 15.000 durante o verán.
A actuación que desenvolverá o Ministerio de Transportes, Mobilidade e Axenda Urbana conta cun investimento de 8,3 millóns de euros procedentes do Plan de Recuperación, Transformación e Resiliencia. As obras previstas inclúen melloras na seguridade e na mobilidade viaria, en particular destinada ás persoas que fan o Camiño Inglés a Santiago.
Segundo destacou Miñones, os traballos pretenden mellorar a cimentación da ponte, ademais de dispor dun novo taboleiro con beirarrúas máis amplas, un novo elemento de contención de vehículos e nova iluminación e varandas. Nos alzados de cantería do conxunto abordaranse tarefas de limpeza, reconstrución e tratamentos de protección.
