O investimento dun millón de euros por parte do Ministerio de Cultura, xa consignado nos orzamentos estatais para 2011 permitirá iniciar a recuperación do Castelo da Rocha Forte, en Compostela. A concelleira de Rehabilitación, Olga Socorro, presentaba esta mañá o proxecto que a cámara municipal lle remitirá ao Ministerio para a vindeira sinatura dun convenio que faga efectiva esta recuperación. A intención do Concello é facer visitable este monumento o antes posible, para o que se desenvolverán novas escavación no recinto interior e se consolidarán e recuperarán diferentes estruturas do conxunto. As visitas iniciaranse xa durante os traballos, e no proxecto está previsto que se desenvolvan cando menos durante dous anos.
