Martín Sarmiento será primeiro homenaxeado no Día do Naturalismo Galego

Hoxe pola mañá celebrouse a rolda de prensa de presentación do Día do Naturalismo Galego, que terá como primeiro homenaxeado a Martín Sarmiento, o frade bieito do século XVIII que foi determinante na investigación xuridica, histórica, filolóxica e tamén naturalista do seu século. A iniciativa foi promovida polo naturalista Rafael Loureiro, pero contou co apoio desde moitos ámbitos das ciencias e das humanidades. Entre as asociacións que manifestaron expresamente o seu apoio están a Real Academia Galega de Ciencias, Adega, a Sociedade Galega de Historia Natural, Hábitat e representantes de Verdegaia e da Federación Ecoloxixsta Galega. O día do Naturalismo galego celebrarase o vindeiro 9 de marzo, que é precisamente o día do nacemento de Martín Sarmiento. O comunicado das entidades que apoian esta conmemoración sinala que: "esperamos que o 9 de marzo, como o Día do Naturalismo Galego, sirva para iniciar un proceso de coñecemento do noso medio, que encete novos e máis profundos estudos naturalistas e científicos. Con esa información, rigorosa e de calidade, ogallá logremos protexer o que aínda se conserva e restaurar o xa estragado".