Lua Gándara e David Fidalgo son galardoados na feira de arte JustMad

Dúas propostas galegas acaban de obter recoñecemento na feira de arte JustMad, que se desenvolveu na capital estatal ata este 26 de febreiro. A creadora Lúa Gándara, de Poio, que participaba neste evento da man da galería Metro, obtivo o premio de coleccionismo Admiranda pola súa obra rosa bebé señor, cadro pintado en acrílico sobre lenzo en 2022. A peza pasará a formar parte da colección que patrocina o galardón, especializada en mulleres artistas.

Ademáis, e segundo recolle o Faro de Vigo, outro galego conseguiu un recoñecemento nesta cita. O lugués David Fidalgo conseguiu o premio Residencia LEA (Lab of Experimental Art), en cuxa sede desenvolverá unha residencia creativa de seis meses. Canda a eles, a galería compostelá Nordés obtivo para un dos seus artistas, o navarro Alberto Odériz, o galardón Cervezas Alhambra de Arte Emerxente.