Hoxe ten lugar unha nova sesión do programa "Dramaturxias itinerantes / Dramaturgias itinerantes, que ten como obxectivo promover un mellor coñecemento mutuo da escrita teatral máis contemporánea entre Galicia e Portugal. Este programa iniciado en 2019, froito da colaboración institucional entre o Consello da Cultura Galega, o Instituto Camões-Centro Cultural Português de Vigo, a Escola Superior de Arte Dramática de Galicia (ESAD) e a Escola Superior de Música e Artes do Espectáculo (Esmae) do Porto (engadida neste 2023), articúlase con dúas intervencións por parte de dúas dramaturgas de ambos lugares, poñendo o foco nas novas xeracións de profesionais das artes escénicas que se están a forma e na dramaturxia de autoría feminina. A lusa Cecília Ferreira, coa peza " Dionísia" e a galega Esther F. Carrodeguas con "Supernormais" protagonizan esta xeira, que terá lugar hoxe ás 17:30 horas na Escola Superior de Arte Dramática de Galicia en Vigo e mañá, 19 de xaneiro, ás 18:00h no Teatro Helena Sá e Costa do Porto. Esta sesión, así como as anteriores, poderán atoparse en edición dixital na web oficial do Consello da Cultura Galega.
