O Día do Usuario/a das Bibliotecas abre, este 11 de xaneiro, o Calendario do Libro e da Lectura 2023. A Consellería de Cultura fixo público este almanaque que repasa as principais efemérides vencellada a estes ámbitos. Ilustrado desta volta por Federico Fernández Alonso, o calendario medra e recolle desta volta un total de 33 datas sinaladas.
Entre as novidades que incorporou a Xunta está o centenario do pasamento de Manuel Murguía (2 de febreiro), os cincuenta anos do pasamento de Pablo Picasso (8 de abril) e o centenario do nacemento do poeta Carlos Oroza (13 de maio). Ademais, tamén se suman ao documento os días do libro electrónico (4 de xullo), da preservación dixital (2 de novembro) e do patrimonio cultural (16 de novembro).
Con este documento a Xunta pretende "impulsar a realización de actividades arredor das principais datas vencelladas a este ámbito e facilitar a súa planificación anual".
Outras datas próximas que se recollen son o Día da Ilustración (30 de xaneiro), o aniversario do nacemento de Rosalía de Castro (23 de febreiro), Día do cómic (17 de marzo), da narración oral (20), da poesía (21) ou do teatro (27 dese mesmo mes).
