Novas datas para a lectura

O Día do Usuario das Bibliotecas, o 11 de xaneiro, e o Día da Ilustración no Libro, o 30 de xaneiro (aniversario de Castelao) son as novas datas que a Consellaría de Cultura engadiu ao Calendario do Libro e da Lectura para 2014. Segundo explicou onte o secretario xeral de Cultura, Anxo Lorenzo, no Parlamento, a entidade pretende homenaxear as persoas que utilizan as bibliotecas e pór de relevancia a importancia da ilustración. Canda a estes, o calendario inclúe datas propias deste ano como o bicentenario de Frei Rosendo Salvado ou os aniversarios de Vicente Risco e Antón Losada (130 anos) ou Leiras Pulpeiro (160). Fronte a isto, e segundo denunciou recentemente Sermos Galiza, a Consellaría non recolle neste 2014 a celebración, o 24 de febreiro do Día de Rosalía, que leva a se celebrar varios anos cunha crecente aceptación social.