O Día do Usuario das Bibliotecas que se celebrou este 11 de xaneiro, é a primeira das efemérides que recolle o Calendario 2020 do libro e da lectura que fixo público a Rede de Bibliotecas de Galicia. A gañadora do Premio Castelao de Banda Deseñada Bea Lema asina a ilustración deste ano, que homenaxea, segundo a autora "a habilidade humana de levar cousas na cabeza".
Para alén das datas máis habituais, como o Día das Letras Galegas o 17 de maio, o de Rosalía o 24 de febreiro ou o Día da Poesía, o 23 de marzo, o calendario recolle celebracións específicas de 2020, como son os centenarios de Isaac Díaz Pardo (22 de agosto) e da revista Nós (30 de outubro). A vindeira efeméride prevista é a celebración, este 30 de xaneiro, do Día da Ilustración.
