Portamérica, Río Verbena e WOS Festival sitúanse finalistas nos premios dos festivais europeos

Tres festivais galegos mantéñense como finalistas nos European Festival Awards, os galardóns da industria do sector destes eventos a nivel europeo, que este ano celebran a súa XIIª edición. Dos oito eventos galegos que presentaron as súas candidaturas nalgunhas das 16 categorías, só tres deles aguantan xa como finalistas: Portamérica, Río Verbena e WOS Festival. Este último, o WOS Festival x SON Estrella Galicia, figura como finalista ao premio a Mellor festival celebrado en recinto pechado do 2022. Nesta categoría o evento santiagués xa foi recoñecido en 2018 como o mellor de Europa daquel ano.

Os outros dous festivais galegos finalistas, producidos pola empresa Esmerarte, compiten en dúas categorías diferentes. A pasada edición do Portamérica, celebrada en Caldas e Portas é finalista ao Premio 'Take a stand', que recoñece aqueles eventos que falan de valores de diálogo pacífico, humanidade, tolerancia e entendemento. No caso do Festival Río Verbena , que este ano celebrou a súa primeira edición en Pontevedra, está como finalista no premio a Mellor Novo festival, que busca decidir cal de entre todos os eventos de Europa é o máis prometedor de entre as propostas que se lanzaron neste 2022. Rematado o prazo de votación popular, que deixou estes tres candidatos galegos aínda con posibilidades, agora só resta agardar polo vindeiro 18 de xaneiro para coñecer cales son os mellores festivais de Europa coa decisión final do xurado.