As curtametraxes protagonizan a sexta xeira de Animacción

Desde este 9 de decembro e ata o vindeiro día 17 a sexta xeira do Festival Animacción achega á Coruña unha selección das máis recentes producións de cinema animado internacional. As actividades botan a andar coa proxección do filme Buñuel en el laberinto de las tortugas e cun encontro con Fermín Solís, autor da banda deseñada na que se basea o mesmo.

A outra longametraxe presente nesta edición será O apóstolo, que se poderá ver o vindeiro mércores 14 no CGAI. De xeito previo, a FNAC acollerá un encontro con Fernando Cortizo e Isabel Rey arredor do filme.

Un obradoiro de guión a cargo de Fermín Solís e a visualización dunha selección de curtas galardoadas no festival internacional de Annecy fan tamén parte da proposta. O programa complétase con proxeccións diarias das curtametraxes a concurso, tanto na categoría infantil como na competición xeral.

Os filmes participantes competirán por un premio do público adxudicado por votación e mais un galardón do xurado coordinado coa Asociación Galega de profesionais da dirección e realización CREA, nos dous casos dotados con 200 euros. Tamén haberá un premio na categoría infantil escolleito polo público.