O mosaico na súa ubicación actual en Nova York (Carlton Hobbs). Fotografía: Gonzalo Fernández-Turégano. Asociación para a Repatriación do Mosaico Romano de Panxón
O mosaico romano de Panxón está esta semana algo máis cerca da súa volta ao lugar de orixe. O Concello de Nigrán ven de facer efectiva este venres a súa anunciada achega de 40.000 euros á campaña iniciada pola Asociación Repatriación Mosaico Romano Panxón de captación de fondos para mercar a obra en Nova York. O orzamento preciso para cubrir o prezo da peza datada no século III d. C. é de 58.000 euros, dos que o resto se conseguiron por un crowfunding con varias accións. O mosaico teno á venda a galería Carlton Hobbs de Nova York e agora prevese finalizar o proceso da adquisición e trasladalo ata Londres , onde será doado ao Concello de Nigrán para ulterior transporte ao Val Miñor para a súa exposición como valor engadido da oferta cultural e turística do Concello.
