Nigrán recuperará o mosaico romano de Panxón que está en Nova York

Finalmente o traballo desenvolvido pola Asociación para a Repatriación do Mosaico Romano de Panxón verá o éxito e o seu obxectivo que dá nome a esta iniciativa privada sen ánimo de lucro será cumprido. O Concello de Nigrán ven de confirmar aos medios a súa intención de formalizar o convenio para facer a súa achega ao financiamento da compra deste ben, que actualmente ten á venda a galería Carlton Hobbs de Nova York. O prezo da compravenda está en 58.000 euros e actualmente hai un contrato de reserva vixente coa galería neoiorquina, en vigor ata o 28 de outubro. O consistorio, segundo avanza La Voz de Galicia, achegará o 70% do valor da operación, 40.000 euros, mentres que a asociación creada a este efecto porá os 10.000 restantes conseguidos a través dunha campaña de doazóns e diversas actividades. Agárdase pola firma do convenio entre ambas entidades para levara cabo a operación co galerista americano e traer de volta este ben para incluílo no patrimonio público de Nigrán.

O mosaico romano de Panxón, segundo informa a asociación, é unha peza arqueolóxica do século III d. C., única representación do xénero musivario cun tema mariño na contorna metropolitana de Vigo, cun incalculable valor histórico. O mosaico coincide co referido no seu momento polo especialista da categoría do profesor Acuña Castroviejo (entre outras publicacións "Vigo en su Historia", paxs. 49 a 53) e foi inspeccionado in situ polo Dr. Carlos Picón, no seu momento responsable da arte antiga do Metropolitan Museum de Nova York (hoxe director da galería Colnaghi da mesma cidade) confirmando a súa antigüidade, orixe e taxación. Representa un peixe, nadando nas augas mariñas, xunto a unhas ameixas e pola súa forma dedúcese que formaría parte dun mosaico moito máis grande, evidenciando a súa vez o alto grao de romanización do sitio do Castro, en Panxón, Nigrán (Val Miñor, Galicia) segundo esta asociación. Achado neste lugar de xeito casual no S. XIX pola familia Puga, máis tarde pasou (encaixado nunha mesa) á colección da familia Blanco–Cicerón, na cidade de A Coruña, perdéndose o seu rastro trala súa venda en poxa pública e posterior saída de España, ata que hai apenas dous anos un dos socios fundadores da Asociación deu ca peza nunha colección privada de Nova York (Carlton Hobbs) e iniciou os trámites para a súa repatriación que agora xa está no seu tramo final cara o éxito.