Foto: Inorde
A Confederación Hidrográfica Miño-Sil xunto co concello de Xinzo abriron a licitación para a restauración do mosteiro do Bo Xesús de Trandeiras. O proxecto contempla a recuperación en varias fases. Nesta primeira intervirase sobre o complexo sistema de provisión de auga do mosteiro, que inclúe canalizacións, fontes, captacións, depósitos e mananciais e recuperar o uso sustentable da auga. Tamén se consolidará o propio edificio. Na actualidade o mosteiro é un gran edificio centrado nun claustro e sen tellado. Consolidarase a estrutura, realizarase unha limpeza e se reporán os elementos caídos, así como se instalarán paneis interpretativos e unha cuberta temporal na torre. Para esta primeira fase contémplase unha partida de 711.000 para a que as empresas poden concorrer ata o 13 de decembro. As seguintes fases contemplarán unha maior definición dos usos do inmoble, como a adaptación da sacristía como espazo informativo ou de celebración de eventos. O mosteiro de Trandeiras foi fundado no século XVI e é un dos escasos representantes do estilo manuelino portugués en Galicia.
