Cultura rehabilita as cubertas do mosteiro de Pantón

O Diario Oficial de Galicia publica hoxe a convocatoria do concurso para a restauración das cubertas do mosteiro de Ferreira de Pantón, por un importe de 469.005 euros máis IVE. A obra consiste en solucionar "os problemas de conservación relacionados coas filtracións de auga" na igrexa románica do mosteiro, no claustro, na ampliación barroca do edificio e así como na Casa das Donas, a residencia das aristócratas que residían no mosteiro. Asemade, as obras permitirán poñer en valor a cociña antiga do mosteiro para as súas visitas culturais e restaurar a fachada barroca, o campanario e a inscrición desa fachada. As obras están cofinanciadas ao 80% polo Fondo Europeo de Desenvolvemento Rexional (80 %).