Malvela e Faustino Luís Seoane son as Mestras e Mestre da Memoria 2022

A Sección de Literatura de Tradición Oral da Asociación de Escritoras/es en Lingua Galega, acordou outorgar o seu recoñecemento Mestra e Mestre da Memoria ao grupo Malvela e ao gaiteiro Faustino Luís Seoane. Este título recoñece as achegas destas persoas ao patrimonio inmaterial do país "ao longo das súas vidas, contribuíndo así a manter viva unha parte fundamental da nosa memoria colectiva e o saber popular".

Ana Acuña, Félix Castro Vicente, Carme Pernas Bermúdez, Calros Solla, Xurxo Souto, X. Manuel Varela, Lois Pérez e Antonio Reigosa conforman o comité encargado da selección. As distincións entregaranse no marco da VII Gala dos Premios Mestras e Mestres da Memoria que se celebrará no Centro Cultural Vello Cárcere de Lugo o 21 de outubro.

Segundo apunta a AELG, Malvela é un "grupo de folk galego interxeracional, creado en Sanguiñeda (Mos)" e lista as trece cantareiras que fan parte da formación, a incluír a recentemente falecida Señora Carmen. De Faustino Luís Seoane lembra que é coñecido como "O gaiteiro do Canizo" na Gudiña e sinala que se trata de "memoria viva dos gaiteiros da súa xeración" e que "foi gravado no ano 1956 polo musicólogo americano Alan Lomax, a proposta de Félix Castro".

De xeito previo a este acto de entrega, a AELG celebra, tamén en Lugo, unha nova xeira dos Faladoiros da Memoria. Co título Cara a onde vas, Entroido?, a sede da Deputación de Lugo acolle o día 20 esta xornada que conta coa participación de Inma Alonso Rodríguez, Xosé Manuel Seixas e Miguel Losada, cun peche musical a cargo de Branca Villares.

Este tema protagoniza tamén a XV Xornada de Literatura de Tradición Oral. Co título Entroido: transgresión e tradición que organiza a mesma sección de Literatura Oral, de novo en Lugo. Este encontro reúne o día 22 especialistas como Felipe Senén, Julio González Montañés, Nieves Amado Rolán, Mercedes Vázquez Saavedra e Xosé Manuel Seixas para abordar diferentes aspectos desta celebración. Os sons da festa, o teatro de Entroido, a tradición no Támega ou o simbolismo das máscaras son algúns dos temas que se abordarán na xornada.