Fotografía dos Malvárez. Fonte: Deputación da Coruña.
Juan e a súa filla Perpetua Malvárez, que desenvolveron a súa actividade profesional baixo o selo Foto Malvárez, foron galardoados pola Deputación da Coruña co recoñecemento Fotógrafo histórico. A vila de Muros acolleu este tres de outubro o acto de homenaxe, ao que asistiu Perpetua.
Segundo explicou o deputado de Cultura, Xurxo Couto, "baixo o selo Foto Malvárez está recollida a memoria social e as memorias familiares e particulares de toda unha comarca ao longo de practicamente un século". Sinalou ademais que as obras dos homenaxeados atópanse en transición "entre as herdanzas decimonónicas e os novos estilos de comezos do século XX, no caso do Juan Malvárez; e na transición do branco e negro cara a cor e cara novas incorporacións técnicas propias do auxe e popularización da fotografía, no caso de Perpetua Malvárez".
Esta é a segunda ocasión en que o recoñecemento recae nunha muller, da que Couto sinalou que "cando iniciou a súa traxectoria profesional se erixiu, con modestia pero con determinación, nunha sorte de pioneira en desempeñar un traballo aínda vinculado exclusivamente aos homes."
