Morre o escritor e sacerdote Elixio Rivas

O sacerdote Elixio Rivas finou o sábado en Salamanca aos 97 anos. Marcha unha figura moi destacada para os estudos de etnolingüismo, etimoloxía e onomástica, e autor dunha dilatada e notable obra, así como proxectos de recuperación cultural como o museo etnográfico 'Devanceiros' do Monte Meda. Rivas, nacido en Fondo de Vila (Xunqueira de Ambía, Ourense), combinou as súas labores relixiosas coa investigación etnolingüística. De aí parte o Léxico Rural do Noroeste Hispánico, un compendio de 25 libros recollendo, en monografías especializadas, os termos do agro. Tamén destacou a súa actividade de difusión e investigación ao redor do Camiño de Santiago, pulando por recuperar a Vía da Prata. Rivas recibiu, polo seu traballo, numerosas distincións como a Medalla de Ouro da Deputación de Ourense 2019 e a Medalla Castelao no 2000.