Marta Pérez recolle o Premio do público do FETEGA Foto: FETEGA
O público do Festival do Teatro Galego, FETEGA, do Carballiño valorou a montaxe 'O Péndulo', de Inversa teatro, como o mellor espectáculo desta 33ª edición do festival. Así se deu a coñecer no acto de conclusión do evento, momento no que tamén se entregou a figura conmemorativa deste recoñecemento do público á persoa de Marta Pérez, codramaturga e actriz da obra. "O Péndulo" é unha obra de teatro-documento que nos amosa como se desenvolveu a sublevación militar do 1936 e o inicio da Guerra Civil en Galicia. O público do FETEGA concedeulle a mellor puntuación, con máis de 9 puntos sobre 10.
Unha das singularidades da obra é que este achegamento á nosa historia colectiva faise desde o persoal. Marta Pérez, trasládanos a experiencia do seu bisavó, Tirso Gómez Freijido, membro do Partido Socialista, republicano e presidente da Casa do Pobo da Cañiza que foi apresado e fusilado no ano 1936 no Castro de Vigo, xunto cos seus camaradas Justo Moure, Jesús Pérez e Antonio Mojón. Outro veciño da localidade, Benjamín Malvar, apareceu asasinado nunha gabia nun alto de Ponteareas. Xunto con eles foi apresada tamén María Gómez, alcaldesa da Cañiza e única muller que exerceu ese cargo en Galicia durante a Segunda República. María conseguiu salvarse do fusilamento no último momento alegando un falso embarazo. Foi condenada a cadea perpetua e rematou vivindo en Lugo coa anarquista Urania Mella.
