Ensaio sobre a cegueira gaña o premio FETEGA

O pasado venres nove de setembro botaba o pano, logo da gala de entrega de premios, a XVII edición do Festival de Teatro Galego (FETEGA) do Carballiño. O xurado do certame seleccionou Ensaio sobre a cegueira, de Sarabela, como mellor espectáculo desta xeira, mentres Pepa Barreiro e Mundo Villalustre acadaron os galardóns como mellores actores, a primeira polo seu traballo en Unhas poucas picadelas, de Teatro do Ningures, e o segundo por Nosa Señora das Nubes, unha montaxe de Teatro do Morcego. O premio de honra foi para Antonio Durán Morris, en recoñecemento a toda unha carreira no mundo da táboas.