O Teatro Principal de Ourense acolle hoxe ás 21:00 horas a terceira edición de "Imos ter máis que palabras", o evento que se presenta como "festival de arte e poesía explícita en Ourense" e que reunirá oito propostas con nome propio que transitan polos camiños da poesía, a fusión, a interpretación e a música. O resultado será unha noite de espectáculo no que a poesía tomará o espazo de diversos xeitos. A veteranía no alternativo de Antón Reixa encontrarase sobre o escenario do Principal coas propostas do rapeiro Steven Russo (Maceda); a fusión galego-arxentina de Catuxa Salom; a escenificación poético musical de Pompa e Boato (Samuel Merino + Fernán Permuy); a dramatización de Luna Gallego (Madrid - Ourense)e as voces poéticas ourensás de Natalia Umpiérrez; Ileltxu Marcos e Nia Aydillo. A noite ofrece así un percorrido artístico de profundidade e moi variado. Aínda hai entradas á venda para este festival.
