A Deputación de Pontevedra daba a coñecer este catro de setembro Depocrea, un programa de residencias artísticas vencelladas ao territorio que se desenvolverá entre o 28 de outubro de o 11 de novembro no Náutico de San Vicente. Un total de seis profesionais das artes visuais participarán desta iniciativa, que conta cun financiamento de 2.500 euros para cada bolsa.
Desde este día 5 está aberto o prazo de presentación de proxectos para participar da iniciativa, que deberán ser "site-specific". Entre os seleccionados terán preferencia "as propostas que se acheguen ao patrimonio da contorna ou avoguen por reivindicar valores como a sustentabilidade, a igualdade ou a inclusión social", segundo adianta a Deputación.
As residencias contarán cunha primeira etapa de creación en formato de portas abertas ou a visita de profesionais do sector, que achegarán asesoramento e experiencias ás artistas participantes. Tamén se desenvolverán iniciativas de divulgación e unha presentación conxunta dos traballos desenvolvidos o vindeiro 11 de novembro.
