Foto: Raniero Fernández / CGAC
Raniero Fernández foi un fotógrafo que desenvolveu boa parte da súa actividade nos anos 50 e 60, á vez que presidía a Agrupación Fotográfica gallega, a entidade máis activa das asociacións fotográficas galegas. Unha escolma do seu traballo, no que sobrancea a ollada documental, pódese ver na mostra "Raniero Fernández. O arquivo" que se inaugurou a semana pasada no Centro Galego de Arte Contemporánea, en Santiago de Compostela. A mostra está comisariada por Manuel Sendón e Xosé Luís Suárez Canal. Segundo os comisarios, "as súas imaxes están lonxe da estética do pictorialismo tardío que caracteriza a fotografía afeccionada do momento". Abordou temas como o porto de Vigo, ou a fotografía de hórreos e cruceiros, "perseguindo replicar en fotografía o que Castelao foi debuxando".
