O Museo Etnolóxico de Ribadavia amosa a conservación da Colección Abrente

O Museo Etnolóxico de Ribadavia abría este 13 de xullo a exposición A conservación do fondo documental Abrente. Esta proposta amosa ata o vindeiro 30 de setembro o xeito no que o centro abordou o coidado e recuperación do fondo artístico e documental propiedade desta asociación fundacional do teatro galego.

Comisariada por Cristina Díaz Sanjurjo, conservadora e restauradora, a obra recolle información e material relacionado co traballo de conservación, así como un espazo coa documentación do fondo Abrente. Este legado recolle material de diverso tipo como documentación administrativa, recortes de xornais, fotografías, folletos, manuscritos, actas, recibos e libros de contas ademais de obras de arte.

A mostra amosa o xeito no que se abordou a análise do estado de conservación destas pezas e as intervencións que se realizaron para garantir a súa preservación e compatibilizala coas necesidades de uso e o seu almacenamento físico.