Apostando de novo pola cultura como ferramenta de dinamización e polo tecido empresarial como apoio dela a Asociación de Empresarios Lugo Monumental organiza desde o luns 20 unha nova edición da SECAL, Semana de Exaltación da Cultura e Arte de Lugo. Esta acción que terá lugar entre o 20 e o 26 terá como protagonista ausente ao artista recentemente falecido Paco Pestana, ao que dedica o seu cartel e do que se ofrecerá unha exposición de obras súas cedidas pola familia. A SECAL recupérase como un xeito de que o tecido empresarial do casco histórico lugués colabore cos artistas locais, prestando os escaparates e espazos de comercios e hostalería para que estes poidan expor e poñer á venda as súas obras durante toda a semana, ademais a SECAL ofrece outras actividades culturais, como concertos e visitas guiadas aos museos Diocesano e Provincial. Ata vinte artistas locais exporán en diferentes locais do casco urbano. O recordo a Paco Pestana, que en anteriores ocasión foi pregoeiro deste evento, incluirá unha mostra que poderá verse na Farmacia da Cruz, da rúa Conde Pallares.
